Act 17 | BJR | STEP | Pauroosa Sirasisa Firipi máqusaindari fíndifi fídaqa Ambipoorisa máqusa faqa Apooroonia máqusa faqa fí aikáteeqa Teesaroonika máqusai óonuraqau. Mi-maqusánaki Yuda máqannaa amaana máqa márinau.

Acts 17

Pauroosa Sirasisa Teesaroonika máqusai fiqau.

1 Pauroosa Sirasisa Firipi máqusaindari fíndifi fídaqa Ambipoorisa máqusa faqa Apooroonia máqusa faqa fí aikáteeqa Teesaroonika máqusai óonuraqau. Mi-maqusánaki Yuda máqannaa amaana máqa márinau. 2 Pauroofa naróosana máreenoo minakí kéeqafinoo misá faqa ufa qinau. Tamummáqara fasiqauqa ákarakinaana ásaana rúmaseenoo minakínaa ufa qímannimufaqa narí qímami narí qímami qímariqau. Qaaramoo Sáririqasaa miqímarinau. 3 Pauroofa tamummáqara ufakinaana qumáreenoo ásauku mundírafa aupúramasee kúqunara faqa Ánutufa miná kafáa mara fíndifunara faqa qímannimimarinau. Miqídanoo Pauroofa qímanniminoo qinau Maa-fasiqáfa Yísufa qinée qímannimunafa mifá kai óoqai Ánutuna ásauku mundírafa máridanoo. 4 Yuda máqannaa iriséeqa akaqáusa Pauroofunnai fiqau. Kirisa máqannaasa Ánutunara rímarusa moómoosa iriséeqa misá faqa misásaa atooqáqau. Úriqarara ánaaseeuqa moómoosa faqa iriséeqa kúqaa fee qímasee misá faqa atooqáqau.

5 Yuda máqannaa akaqáusa níkooqee márusa rairai qímasee ánaamuru moómoo nífiqaidanoommifoo qímasee mandá fasiqauqa kudi fasiqauqa náaramásoofaqa moodáanaki suqúfiqa táunna qámbaanai óonuree anirée másee áanóo firaaná uqéeraqau. Misá suqúfufaqa Yasoona máaqa óonu upukámaseeqa Pauroosa Sirasisara máridammiafoo qímasee rapéemasee níndafoo faqa sía márufaqa Yasoona faqa Yísuna ufa írimarusa akaqáusa kai mi-maqánakinaana paqúrimásee maqámau rarisée kiapausunnai múnuseeqa maaqí qiqau. Níndafa maa-fasiqáusa aiqáma maqusa maqusa mandúfa uqéeraqa níniaasa ifaqa maa-maqusánaki faqa aniraafanoo Yasoonafa maréeqeenoo narí máaqaki quqásaifaqa faiqéeqa. Misá maasá Roomma máqannaa karaambáiqa sándufa aiqáma rukíaidaqa misá maasá Roomma máqannaa karaambáiqa mináuqu Sisaana arusée narí karaambáiqa moó miná áuqu Yísufa miná áuqu uqéeraidaqa miqídaqa.

8 Miqí qímasoofaqa faiqí ánaasee aiqámausa kiapausa faqa mi-fuka karaambaiqáfa kambíqafinanoo maasá Roomma máqannaa qeeqá karaambáiqa namufaqa dáruandoo qímasee firaaqóo taútiqau. 9 Kiapausa Yasoona sáimbaqa Yísuna ufa írimarusa faqa aiqáma munnimmara qufaqa nimisoofaqa idukíqau.

Pauroosa Sirasisa Beereea máqusai fiqau.

10 Yísuna ufa írimarusa márufanoo eendúfaqa Pauroosa Sirasisa nífiqa quqásoofaqa asukunai Beereea máqusai fiqau. Mi-maqusánai óonureeqa Yuda máqannaasa amaana máqaki kéeqaqau. 11 Beereea máqusanaasa sía Teesaroonika máqannaa naanna rée marúsa misá írirana írimarusa máriqau. Misá faasaambáasaana afeekaikámándee karaambáiqa fasáasa ufa íriqau. Misá tamummáqara fasiqauqa ufa ákarakinaana randásee qáfee maríqau Pauroona ufara kúqaa ánoonee sía fee ánoonee qímasee ákarakinaa ufauqára randáqau. 12 Miqídaqa Yuda máqannaasa faqa Kirisa máqannaasa faiqí firaasá moómoo faqa Kirisa máqannaa ánaaseeuqa moómoo faqa misá aiqáma Yísunara kúqaa ánoonee qímasee írimariqau. 13 Teesaroonikai máru Yuda máqannaasa minára iriséeqa Beereea máqusai óonuree faiqí ánaasee aiqáma nírana fundákusoofaqa Yísuna ufa írimarusa faiqí firaasá nífasausaikirausa Pauroona umeé aqiqoofanoo ooruku námmari áfainni finau. Sirasifa faqa Timootifa faqa káqi miqóo máriqau. 15 Pauroona áfiqee fusá Ateensa máqusai múnu aiséeqa óonurandee aniréeqa Sirasisa Timootisa qímannimiqa qiqau. Pauroofa ínniqara náaraidanoo dóo Ateensa máqusai fuaqa.

Pauroofa Ateensa máqusai finau.

16 Pauroofa Ateensa máqusai Timootisa Siraasisa nífeesidanoo níndafoofaqa Ateensa máqusanaasa maqánnai faqa óoninnai faqa saqárinnoo faqa óosana óosana ainaina nimana áuqusee maasá Ánutu fee qímasee innaaru qímariqau. Pauroofa miná qáfamasoofanoo ákooqanau. 17 Firaaqóo ákooqoofanoo ákooqeenoo apátufanoo Yuda máqannaa amaana máqaki kéeqafufanoo Yuda máqannaasa faqa ánaamuru minakí anikéeqeemarusa faqa Yísunara ufa qímarinau. Maqúsa qámbaanai faqa faiqí ánaasee faqa aiqámai ufa qinóo ninau.

18 Ateensa máqusai írirana fíqararausa maqee maqee súqida márunaki súqimariqau. Óosana óosana sukúraki kéeqeeusa Ateensa máqusai maqee maqee súqimariqau. Eepikurianna sukúra tisáauqa moó íriranamau fímariasa faqa Sitookika sukúra tisáauqa misá moo íriranamau fímariasa faqa Pauroona ufa átikai iriséeqa nóori uqéeraseeqa Pauroonara maaqí qimasee uteéti qídaqa qiqau. Maa-iriranná síai fasiqafa narí afaaqa fífau amooqída nána úfee qídanoo fee. Akaqáusa maaqí qiqau. Mifá ánaamuru Ánutusara qídanoo. Pauroofa Yísufa kúqiranakiqari fíndifunara qímannimufaqa misá tautúmasee dapi ufa qídaqa uteéti qímariqau. 19 Misá miqí qímasee Pauroona áfiqamaree firaa akara maaqa miná áuqu Areeoopakusa mi-maqánaki fiqau. Firaa irirana faqáasa kai minakí súqimarunaki áfiqee fiqau. Minakí suqúseeqa Pauroonara irámmiriqa qiqau. Anée fúka ufa qímannimianaqa maasá miná írirara súqidaqa. 20 Mi-ufána qíannanaki maasá akaqáinainara randáidaqa. [ 21 Ateensa máqusanaasa faqa ánaamuru animárusa faqa óosana óosana fúka írirana írianee qídaqa minára kai irimáree fímariqau. Misá minára Pauroona irámmirí maríqau.]

22 Pauroofa miná iriséenoo misá nóorinni fíndifinoo qímanniminoo qinau. Óo ínnee Ateensa máqusanaasa qinée maí ánidaqa ínni óosanara qáfaidaqa íridaqa káaqa ínnee Ánutuna óosana óosana ainainannái nimana áuquseeqa maasá Ánutusee qímasaidaqa innaaru qiqánuasa. 23 Qinée ínni maqúsai óonuree anirée níniíqa ínneeqa aandáu̱ arusée tatúfimari qaindausa qáfeeqa. Ínnee moómoo Ánutusara óosana óosana innaaru qímariasa máriafaqa qinée qáfeeqa. Aiqáma qáindauqasaa mi-anutúsa núqu ákara rinoo márifaqa qáfeeqa. Mooqáindasaa ákara kai rinoo márifaqa qáfeeqa. Sía maasá írunna Anutunee qímasee ákara kai rúmaqaafaqa qáfeeqa. Mee ínnee sía írimaria Ánutuna minára innaaru qímarianara miná áuqu óosana koorooianáura.

24 Ánutufa innaarúna faqa maqá faqa aundurákinaa ainaina márina mináuqa áuqu Ánutufa máridanoo. Mifá innaarúna faqa maqá faqa áuqufa mi-ainainná karaambáiqa máridanoo. Sía faiqí nísaukunnai áuqueeqee amaana máqaki quqáqaafau máridanoofau. 25 Mifá narí kai náanna faqa márirana faqa faiqí faiqi nímimarifa máridanoo. Mifá nána ainainaree sárauímarifa márinaqee maasá qeeqá íriranannai kadáapirumeeqee ámianauree, sía amana. Aiqáma ainaina narí kai áuquqoofa kai máridanoo. 26 Mifá kai moodáa fasiqa áuquqoonasaaqari kai aiqáma máqannaa kambíaqa máridaqa. Mifá naríkai óosana ároonakiqari aiqáma ánaamuru quqánnisáqoosa kai máridaqa. Mifá qufaqa misá márirana óosumma nímaqóonakiaqa kai marimáree fímariafanoo. 27 Sía fífau, óoqai Ánutufa miqínau. Asukunakí máridaqa Ánutunara míkimmakidaqa randáidaqa paqúrinafa paqúriaqee qímaqoona miqímaqoona miqí maríafanoo. Sía Ánutufa faiqí níanai márifa máridanoo. Faiqí naaqá máridanoo. 28 Miná máriranaki kásiranaki maasá máridaqa. Ínni ufasáa rakísirausa misá faqa minára maaqí qímariafanoo maasá faqa miná faiqi námu kai máridaqee qídaqa.

29 Misá miqí qímaqoona qinée minára minakína ookáamasee qinée maaqí qídaqa. Maasá Ánutuna faiqi námu máridaqa náqimásee maasá quándakina qeeqá qíkoona amana kóorannai siruáannai óoninnai miná ámmeemmee rianáuree. Sía andeeqánoo máridanoo.

30 Óoqai faiqí misá Ánutunara randáidaqa asukunakínai míkimaki ánidaqa máriqau. Ánutufa mi-kamúqoora dóo aunúseenoo sía misá fúrufarirana ákiaqara nárinau maqee maa-kamúqoo aiqáma ánaamuru nári mandáinainakiqari quándakiqa Ánutufinai ubeekaaqée qídanoo. 31 Mifá aiqáma máqannaasa moodáa fáasaana ufa irisée narí andeeqáranannai andeeqánnisáannoo. Dóo mifá útaaqamáqaifanoo mi-faasaannáfa máridanoo. Ufa írimari fasiqafa faqa utáaqamaqaifa máridanoo. Mi-ufána írimari fasiqana Ánutufa kúqiranakinaana mara fíndifunannai kooroo inóo máridanoo.

32 Írirana faqaasa súqimarusa kúqiranakiqari fíndifunara qímannimufaqa akaqáusa naanaidara qímariqau. Akaqáusa kafáa moo kári írianee qiqau. 33 Miqí qímasoofanoo Pauroofa ráudamakinoo finau. 34 Fufanoo faiqí akaqáusa minásaa atooqáfi miná ufa írimariqau. Moo fásiqa áuqu Dioonisiusafa ufa suqíra maqa Areeoopakusa súqira máqaki kéeqee marúfa márinau. Ánaasee moo áuqu Damariasa námmarifa mifá faqa faiqí ánaasee akaqáusa misá faqa Pauroona ufara kúqaa fee qímasee minásaa atooqáqau.